نذیر کہوٹ
ایڈیٹر : جینیئس کراچی
شمارہ نومبر – دسمبر 1994

کیہ پنجابی زبان نوں پنجابی رسالیاں وچ جیہناں نوں حکمران ٹولہ تے فیڈرل گورنمنٹ چلان آلے پڑھدے ای نہیں اداریئے لکھن نال اپنا حق مل جانا اے؟ کیہ عالمی پنجابی کانفرنساں دےاں منگاں مگروں پنجابی پنجابی وچ ذریعہ تعلیم بنا دتی جاوے گی؟ کیہ پنجابی بارے سیمینار کروان نال پنجابی ایہنوں پڑھنا بولنا تے لکھنا شروع ہو جان گے؟ کیہ پنجابی دا نعرہ مارن آلیاں تے آزمائے ہوئے پنجابی آگوواں تے پنجاب اسمبلی دیاں ممبراں دے آگے پچھے پھرن تے اوہناں نوں اپنا فرض یاد دوان نال پنجابی لاگو ہو چکی اے؟ کیہ ڈیڈھ ڈیڈھ اٹ دیاں مسیتاں بنان والے تے آگو بنن دے شوقین تے Visionless بندے پنجابی دی راہ ڈکن آلی ’’اینٹی پنجابی مافیا‘‘ دا پنجابی دے دوالے آکٹوپس وانگ چڑھیایکڑ بند کپ سکدے نیں؟ میرا خیال اے کہ اپردسے گئے سارے آہر کرن مگروں وی اسیں پنجاب وچ پنجابی زبان نوں ایہدا حق لے کے دین وچ ناکام ہوچکے ہاں۔ پنجابی زبان دا حق دواون لئی اُپر بیان کیتیاں گئیاں ساریاں گلاں پنجابی زبان دی تحریک دے وکھو وکھ پکھ نیں۔ جے ایہناں کچھ وی ناں ہوندا تے پنجابی دا ناں لین آلا وی اج کوئی نہ ہوندا۔ خورے میں وی پنجابی دے حق لئی تن زباناں وچ رسالا نہ کڈھ رہیا ہوندا یا فیر ماڑی چنگی پنجابی لکھن تے اپنیاں بالاں نال پنجابی بولن دی آہرنا کردا پیا ہوندا تے ناں ای پنجابی تے پنجابیاں دے حقاں تائیں ورتے گئے سارے آپشنز ورتن ول دھیان دے رہیا ہوندا۔ جس طرح کہ گل ہو رہی سی کہ پنجابی زبان نوں اورا حق دوان لئی ہن تائیں ورتے گئے سارے آپشنز د اکوئی عملی نتیجہ نہیں نکلیا پنجابی نوں ایہدا حق دوواں لئی آخیر ایس مسئلے دا حل کیہ بنے؟ میرے خیال وچ ایس مسئلے دا نرا کو حل اے پئی پنجابی زبان نوں حق دواون تے پنجاب نوں ونڈ توں بچاون لئی کروڑاں پنجابی لوکاں نوں انصاف دوان لئی سانوں پنجاب وچ اک زبردست پنجابی قوم پرست سیاسی تحریک آرگنائز کرنی پووے گی۔ پنجابی زبان دا مسئلہ سیاسی مسئلہ ہے۔ کیوں جے ایہدی جڑ حکمران ٹولے دے استحصالی سسٹم نال جڑی ہوئی اے۔ اج پنجاب دیاں پنڈاں، قصبیاں تے شہراں وچ ہر بندہ پنجابی لکھنا پڑھنا بولنا شروع ہو جاوے تے پنجابی دفتری تعلیمی تے سرکاری زبان بن ونجے تے چونڈھی برابر رولنگ کلاس ایہدا ظلمی راج تے ایہناں دی بدمعاشی آلا کرپٹ استحصالی سسٹم ایک منٹ توں اگدو ڈھے تے تہس نہس ہو جانا اے۔ پنجابی زبان دے پنجاب وچ لاگو ہون وچ سامراج تے اوہدے پنجابی گماشتیاں دا راج تے اوہناں دیاں لودھاں دی موت اے۔ ایس واسطے ایہہ ویلے دی لوڑ اے پئی اک قوم پرست پنجابی سیاسی تنظیم پنجاب سمیت پورے پاکستان وچ آرگنائز کیتی جاوے (پورے پاکستان وچ ایس لئی کہ ایہدا اثر پورے پاکستان دی سیاسی صورت حال تے پوسی تے دوجیاں صوبیاں وچ رہن والے پنجابیاں نوں ہر حال وچ ایس تنظیم نال جوڑنا پوے گا اتے دوجیاں صوبیاں دیاں قوم پرستاں نال وی سیاسی ڈائیلاگ دا سلسلہ جوڑنا پئے گا۔ نہیں تاں ایہہ فیل ہوویسی‘‘ پنجاب دے وچ پنجابی نوں لاگو کروان لئی ایس تحریک دیاں آگواں دانشوراں تے کامیاں نوں ہن ایہہ فیصلہ کرچھڈنا چاہیدا پئی پنجابی زبان نوں ایہدا حق دواون لئی کیہڑی راہ پئے۔ ویلا آ گیا جے ہُن پنجابی لکھاری، دانشور، کامے تے ماڑے چنگے آگو رل مل کے قلم چلان دے نال نال پنجابی زبان دے حق لئی تے پنجاب نوں ونڈ توں بچان لئی سیاسی تحریک آرگنائز کرن والے پاس بہلا دھیان دین۔ انسانی تاریخ ایس گل دی گواہ اے کہ جدوں کوئی قوم مرن دی کدھی اُتے اپڑ جاندی اے تے اوہدے لکھاری، شاعر، سوجھوان تے سیانے لوک وی قلم کتاب تے امن پیار دا پرچار اک لاہمے رکھ کے بندوقاں چا کے اپنے لوکاں دے جائز حقاں دی خاطر لڑن،مرن تے مارن لئی پڑ وچ آکھلوندے نیں۔ پنجابی لوکاں وچ ایہہ سبھ توں وڈا بھیڑ اے پئی اوہ اپنی دھرتی ماں تے اپنیاں حقاں دی جنگ اِک مُٹھ ہو کے لڑن دی تھاں وکھو وکھ ذاتی تے کلم کلا لڑدے آ رہے نیں۔ پنجابیاں دی ایسے احمقانہ پالیسی نے پنجاب نوں صدیاں توںبرباد کر کے رکھیا ہویا اے۔ پر ہُن ایہہ پالیسی ہور جاری رکھن دی جازت نہیں دتی جا سکدی۔ پنجاب، پنجابی اتے پنجابیاں نوں بچون لئی جنے وی پنجابی اکٹھے ہو سکدے نیں۔ اوہ اکٹھے ہو کے آون والے اوکھے ویلے دا مقابلہ کرن دی سبیل چھیتی کرن۔ پنجاب تے پنجابی دے دشمن تے ساڈے نشانے ساہمنے سانوں صاف پئے دسدے نیں۔ اسیں نشانہ لان آلے تے بنیئے۔ جے اسیں ایمانی طور تے پنجابی نال سچے ہاں تے سانوں ایس معاملے بارے ایکا کرن وچ چر نہیں کرنا چاہیدا ۔پنجاب وچ پنجابی کسراں لاگو سکدی اے ؟ پنجابی نوں اید ا جائز،قانونی،آئینی تے جماندرو حق کویں ملنا اے؟ میرے نیڑے پنجاب وچ پنجابی نوں لاگو کروان دا اکو راہ ہے اتے اوہ ہے تخت یا تختا۔

نذیر کہوٹ
چیف ایڈیٹ